Ibadadom bekostrui tas teo. Fe na jixi hinto nongyoyen kostrui lil ibadadom cel na oko ku ke tipo fe teo ger precu.
Arepo kostrui ibadadom in sesu medan, vinamra to, bannumer petra beperkipa cel na fale petrakipa, ji xafe dua din, teo inogarcu.
"Mi onxala ki yu sen xuhali teo," Arepo loga, ji establi mazbahu ji atex dua kano fe gandum. "To ger sen bon, yu jixi." Te oko cel infer ramadu pentudo per petra, petralari kipagido fe meylu, ji kof ji garu sesu kapi. "Mi jixi ki to no sen multi to," te loga, har sesu jegamili topi in sesu hanta. "Mas - mi xa dento hu mi abil na da. To ger sen bon na fikir ki hay teo fe na jawguoko mi."
Jaxadin, te awizin dua injir, ji jaxadin, te pasa des minuto of sesu soba fe na side fe comen de ibadadom fe na kido. Fe tigayum din, teo xorpala.
"Yu ingay na idi cel ibadadom in xaher," teo loga. Tesu voka sen kom tremecu de gandum, kom ay de medanmaux fe na pawbu pas gras. "Real ibadadom. Bon to. Am ewreka ban real teo cel na baraka yu. Seli mi no sen daydenpul te, mas mi xa ible sen abil na bon pala tem yu?" Te cudu dahun of drevo, ji exnafasu. "Nun, mi no vole na sen lutufkal. Mi suki hin ibadadom. To sen kufimo konfortane. Ibada dupul sen bon. Mas yu no abil na cipenkal imanu ki he banto of hinto xa cudu he banto tas yu."
"Hinto sen max to kom mi le gitay, denwatu hu mi le kostrui to," Arepo loga, fe na leta sesu mingal ji na infragi se cel geo. "Am loga tas mi, yu sen kepul teo, fe moy kaso?"
"Mi sen te fe sokutudo dahun," te loga. "Wermu hu da harka bax geo. Byen fe drevolari ji medan. Unyum inyo fe jamexey leki unyum taluji sokutu. Kexru de pingo durki to bekata yusu denta. Mi sen teo fe des dua alo nilto, awjetixey hu da sencu fasiduxey, momentoli xoroko. Alocu in hawa, ji denwatu to awsen."
Teo amiku exnafasu ripul. "No hay seba fe ibada tas dento, no kom Jange, or Xuha, or Bofun. Am hifazi yusu kido tas xey ultra yusu krasi, bon nongyoyen. Yu sen daydenmo lil in globa. Daydenmo juruhaible. To sen maxim bon na kido tas ban maxmo bon te kom mi."
Arepo cudu kano fe gandum ji pangugi to intre sesu denta. "Mi kufimo bon suki hinpul ibada," te loga. "Fe folo, eger yu no antiya, mi fikir ki mi xa duregi to."
"Am fale dento hu yu xa da," teo loga, ji ruidi maxmo amiku cel in petra. "Mas am no loga ki mi nilwatu jingo yu."
Arepo ger loga kido lefe ergo fe soba, ji te ji teo juifikir tem drevo fe sotikalya. Plu din pasa denpul, ji plu sabedin, ji denwatu, Bofun ingulun, syahe ji sayegine ji sotipul. Te sela Arepo su medan, treme tayla of tesu sakfu, barku tesu zeytunidrevo ji mingi to cel ramadu. Jaxadin, Arepo ji sesu bete anda intre gandum, fe na hifazi dento hu ete sen abil. Lil ibadadom bedisgi tras medan, ji fe folo, denwatu hu ergo sen finido fe den din, Arepo toncudu petra ji rutongogi bage.
"Beyongukal ergo," teo lilpala, mas fe na retilne ruata cel in ibadadom fe hataya. "Le hay nilto hu mi le abil na fale da cel na juyuen yu of hinto."
"Imi xa sen bon," Arepo loga. "Bofun le awventocu. Imi xa rikostrui. Mi no hare daydenpul dabihu nundin," te loga, ji plasi ban kasirudo gandum, "mas mi fikir mi xa balagi hinsu basi jaxadin, kam bon?"
Teo weytreme in ibadadom ji exnafasu.
Nyan pasa, ji denwatu alo to. Ibadadom hare cengudo divar fe petra, sakfu fe jadalado xube. Arepo su jara lilhaha durki ete pasa to. Banete of etesu bete awizin fruta ji flura. Ji denwatu Xuha malsukses, teolari rucudu sesu hadya. In Arepo su medan, gandum xorxunjan dambo ji bangura. Plu person daywawa ji ciru sesu gawni, tosa junimeme ji taruta etesu damu, oko cel geo yon terordo oko ji idi cel bistar yamkal. Arepo ata ji side fe comen de ibadadom, fe moy flura na sen zubuldo, fe moy fruta na sen orugado kutle, fe Arepo su pampasi na beonexa pas sesu cati, fe tesu hanta na haji treme, ji lilpala kido.
"Hay nilto hinloka tas yu," teo loga, sangucune in luminkalya. "Hay nilto hu mi abil na da. Hay nil faleible to." To treme, ji extuko sesu lexi. "Hinto ibadadom sen keto minus alo fuha tas yu?"
"Imi -" Arepo loga, ji sesu voka treme. "Nun, to le sen nenxuhapul nyan," te loga. "Imi le ultrapasa hinto fe leya, imi xa ultrapasa hinto ripul. Si imi sen yampeldo," te loga. "Imi haji hare soho, kam no? Ji multi person le kido tas alo teo, mas to no le gardi ete of hinto. No," te loga, ji nokapi, ji leta ban orugado burplanta per mazbahu. "No, mi fikir ki mi kufi bon suki imisu ordenu."
"Maxmo bur to xa ata," teo loga, of kavukexey de petra. "Ji xa hay nilto hu mi abil na da cel na juyuen yu."
Plu nyan pasa. Arepo resta orugapul hanta per ibadadom fe petra ji fe ban din pasa un satu denloka, sonxido fe juifikir ton teo.
Ji un kismetudo din, of tras bahari, luminkal kom vino, Jange ata.
Arepo ata malpedane tas ibadadom fe nunya, tesu hanta presyon cel per sesu fubu, fe na pentu santodom yon sesu damu. Fe ruke de te, sesu medan fe gandum atex, ji osto atex cel syaheya in oto. Te ata fe na retil yon sesu janu cel ibadadom fe katado petra, ji teo exajela cel na oko te.
"Mi le no abil na juyuen ete," teo loga, fe sesu voka na sen cote wawa. "Mi asif. Mi asif. Mi day day asif." Dahun sokutu atexne of drevo, narem hanman barix fe ramadu. "Mi le fale nilto! Fe moy hin nyan, ji mi le fale nilto tas yu!"
"Xux," Arepo loga, fe na xeto sesu damu, fe sesu okoya na posmingucu. Te plasi se per comen de ibadadom, fe fronta plasido per petra fe na kido. "Am loga tas mi," te lilloga. "Am loga tas mi ripul. Yu sen kepul teo?"
"Mi -" teo loga, ji lungogi gebo, fe na hanta Arepo su kapi, ji klosi sesu oko ji pala.
"Mi sen te fe sokutudo dahun," te loga, ji pregi imaje fe oto. "Wermu hu da harka bax turan. Byen de drevolari ji medan. Unyum inxo fe jamexey leki unyum taluji sokutu. Kexru de pingo durki to bekata yusu denta." Arepo su labya buka cel tabasum.
"Mi sen teo fe dua des alo nilto," te loga. "Petalo fe fluracu hu da sencu fasiducu, momentoli xoroko. Alocu fe hawa-" Tesu voka kasiru, ji te wawa. "Leki to awsen."
"Meli," Arepo loga, fe sesu damu na tyan petra, na garaku cel in turan. "Moyoto. Moyoto le sen daydenmo meli."
Ji durki medanlari atex ji dudan awbloki dura, durki ixu bepeda in presyontul ji damupul Jange dure na frongadibuya, durki asman awizin sesu gadibuya cel geo, bijayen Arepo leta in sesu vinamra ibadadom, fe sesu kapi na bebinan petra, ji ruata cel ogar cel sesu teo.
Sora ewreka ibadadom har osto in to, sakfu insokutudo per oto.
"O, simpatilaye teo," te loga, "Har nilte cel na inturan yusu finili are." Denwatu te esto, koski te sen of dayteliya. "Or kam hinto sen maner feki moryen bexerafu hinloka?" Teo bejagegi of sesu juifikir.
"Tesu name le sen Arepo," te loga, "Te le sen bijayen."
Sora xorbefobi, xosu, koski te le nilwatu ore voka de teo. "Mi abil na xerafu te kemaner?" Te swal.
"Am inturan te," Teo loga, "Bax misu mazbahu."
"Okey," Sora loga, ji idi cel na cudu sesu goyutul.
"Am intizar," teo loga denwatu hu te ruata ji xoru na toncudu osto of intre kasirudo xube ji sokutudo dahun. Te awleta oto per gulunxey fe nenkolordo yomo, sol textil hu te hare. "Am intizar," teo loga, "Mi no abil na fale he banto tas yu. Mi no sen teo fe he ban beyongupul to."
Sora ruside per sesu hilu ji oko mazbahu cel na juiore teo.
"Denwatu hu Bofun le ata ji destrui tesu gandum, mi le no abil na juyuen to," teo loga, "Denwatu hu Xuha possukses ji te le sen yamkal, le no abil na yamgi te. Denwatu hu Jange le ata," teo su voka treme. "Denwatu hu Jange le ata, mi no le abil na gardi te. Te le ata exdamune of jento cel na morcu in misu gebo." Sora oko ripul oko cel infer osto.
"Mi fikir ki yu sen teo fe banto daymo beyongupul," te loga.
"Keto?" teo swal.
Sora jawgupul lifti kapala cel per textil. "Yu sen teo fe Arepo."
Plu generasi pasa. Deha rusehacu of sesu tragedi---baytu berikostrui, jarden beriplanta, juruha besehagi. Lao ixu hu da ban leli watu ogar per liljabal ji pala tas petra ji petramon, xorfe lungo leli watu, bewanji, sed ibadadom estay fol tesu name. Maxori te imanu ki to sen kal, koski teo hu da ogar denloka lefe ban lungo watu xorsotikalcu. Fe hataya, he bante, hu da pasa harabucune ibadadom, ganjon guton in sesu tutum, kwas te temwawa sonxido doste. Bardi hu da idi ex ibadadom su inididom cotegi etesu ruho, ji awgardi he ban ible visitayen, minus nadir ji espesyalmo jixikal nini hu da awresta lil lari fe pinku ji sefide flura hu ete toncudu da of weyyane grasgeo.
Teo side in sesu xantipul ogar, fe na awoko teli dolo, pedayen, ergouma, ji wagon, fe na barixgi dahun hu na espiral wey harkapul peda. To le sen kemo lungo? Globa fronkadam nenhar te, koski te jixi ki no hay gibeible sahay. Globa mimbay sen kruel loka, ki hata beyongupul teo beawresta, eger nongyodom abil na besela, xuha abil na frutakalcu, ji baytu abil na atex, te fikir.
Te xoraham ki insan sen rasonakal bekreaxey, hu da ger kido tas teo hu da noro abil na gibe xiwon nor baraka tas ete yon bon samredi. Kete ger hifazi ibadadom ji tonporta dabihu har nilto kom rugibe. Kete ger gibe sesu tongoya ji medita ton daydenmo frutakal teoxey. Kete ger inturan nenkonedoyen nenhar onxala fe fayda. Daydenmo ajabu, sukseskal lutuf bemalyongu ete tas te. Daydenmo daybon, bobo, fadilapul, onxalakal bekreayen, insan sen denpul.
Fe folo te pentu surainfracu yon jalo dahun, volegi wermu na danse in sesu turan, pulgi byen intre drevolari ji medan yon flura ji beri, vento hawa yon yawne bardi leki bardimosem ata, censugi pingo celki katina, roso efelidi cel na bekata incune denta, ji des dua alo nilto, fol memori de ixu hu da ban leli watu cosan teo su ergo yon sesu morcune nafasu.
"Salom, Teo fe Moy Vinmara Melixey in Globa," konedo voka voka.
Semiklosido gona de teo su oko axke cel per tabasumne labya. "Arepo," te lilpala, koski sesu voka sen motsupul kos tosu durcennyanli palakalya.
"Mi sen teo fe cungiya, fe lil lutufxey, fe nenkasiruible binde. Mi sen teo fe alofil, xartikal lubi, fe durmoywatuli dosteya, ji xinloy," Arepo deklara, fe na trankwilogi alote yon moy lexi.
"Dento sen daybon, Arepo," te jawabu intre axke, "Mi sen daymo hox tas yu---daydenmo kowapul figura xa yakin haja day ibadadom. Kam yu xa awidi cel xaher cel na toncudu ibadayen? Yu xa bedaylubi moyte."
"No," Arepo tabasum.
"Maxmo teli kom dento, cel cuyoxaher, fe den kaso? Xukra kos na visita hinloka lefe yusu awidi."
"No, mi xa nor idi cel denloka," Arepo nokapi ji lilhaha.
"Hata maxmo teli? Daydenmo ambisipul cele mimbay behare yu. Hay nil xanki in misu siko ki yu xa sukses, fe moy kaso," lao teo duregi.
"Fe fato," Arepo jundwan, "Mi ger suki na resta hinloka, eger yu xa izin min."
Alo teo bepalakalgi. "...Yu ger vole na ogar hinloka keseba?"
"Mi sen teo fe nenkasiruible binde ji durmoywatuli dosteya. Ji yu sen teo fe Arepo."