Legayen Sr. Uterson sen ixu har sakate muka hu da nilwatu belumin tabasum; bardipul, hifazifil, ji bexyucifil in intrepala; rupul fe ganjon; dambo, lungo, gubarpul, poskweho, ji fe hataya, banmaner lubilaye. In dostesim tonata, ji denwatu hu vino finbesuki tesu xeto, ban mimbaymo insanli to brila of tesu oko; sipul, banto hu da nilwatu ewreka incu cel tesu pala, mas da pala no sol in hin sotikal simbolo fe xafe-axamyamli muka, mas maxmo pimpan ji sotipul in fale de tesu jiwa. Te sen xucyofil tas se; te glu jine durki te sen solo, cel na antiya xeto cel nyanxuha; ji fe hataya ki te furaha teatro, te dupul pasidi dwer de un to dur duades nyan. Mas te hare aprobado tahamul fe aloete; fe duli mara, jixipeldo, kriban har haseda, tem day presyon de xabahu hu da rol in etesu burfale; ji, in he ban poscentroli kaso, fil na sahay fe taytu fe na posaprobi. “Mi filya Kayn su malxinen,” te le jixipul duloga: “Mi le izin misu sodar na idi cel dyabol fol sesu dao.” Fe hin person, xanse pimpan sen tesu cel na sen finili reputasibon bekoneyen ji finili bon efeto in jiwa de infraidine ixu. Ji tas hinpul ete, daydenmo lungo feki ete ata cel tesu kamer, te nilwatu onexa saye de alocu in sesu konduta.
Fe nil xanka, hin dadal sen asan tas Sr. Uterson; koski te sen nenmonifil fe maxim bonya, ji hata tesu dosteya kwasisen basido fe sim moyliya fe bon-natura. To sen ixara fe vinmara ixu, na swikara tesu dosteli dayra jumbi-faledo yon hanta fe kihoy; ji den sen metode de legayen. Tesu doste sen denete fe tesu suli damu or denetu hu te dupul kone da fe maxim lungo watu; tesu ganjon, denpul kom lablabu, sen xunjan fe watu, ete anxi nil nasibu in xey. Fe folo, hay nil xanka feki tonganjon hu da ungi te tas Sr. Ricard Enfild, tesu teli familyen, bon-konedo ixu in xaher. To sen jozi cel na kasiru tas multi te, ku hin dua te abil na soho oko keto in alote, or ku ete abil na ewreka ke komun tema. To bereporti denete hu da ewreka ete dur etesu Soladinli sampo, ki ete loga nilto, okocu sol posamusane, ji ger salom, har mimbay laxocu, okocu de doste. Fe moy dento, dua ixu maxim gao jacigi hin exidi, kolyo oto cuyo jawheri de moy sabedin, ji no sol celcomengi okur fe furaha, mas hata antiya voka fe bisnes, celki ete ible xa furaha oto blokikal.
Fe xanse, dur un to of hin sampo, etesu dao lide ete fol ofdolo in ixgalupul zona fe London. Dolo sen lil ji sen denpul hu ren da name sotikal, mas to pel jiwapul xogyo dur midisabedin. Moy ogaryen bonjiwa, fe kwasiya, ji moyete ambisipul onxala na hata max bon fale, ji disleta godoxey fe etesu danyam fe flirti; celki fronta de dukan estay fol den pasadao har hawa fe invita, denpul kom satarilari fe tabasumne maydoyen. Hata fe Soladin, denwatu hu to koberi sesu maxmo flurapul carme ji resta komparalimo kal fe pasa, dolo exbrila fe kontraste fe sesu brilakal jaradom, denpul kom atex in drevolari; ji yon tazemo pentudo janeladwer, bon-polishodo hwandunxey, ji umumi safeya ji kwehoya fe notalayeya, fori bebujo ji besuki oko de pasayen.
Dua dwer of un gono, fe suo comen cel dongu linea bekasiru inididom de medan; ji fe he den watumon ban kwasibur kano de kostruixey frongi sesu tigagon per dolo. To sen gao fe dua cengu; onexa nil janela, nilto minus dwer in cote cengu ji okokal fronta fe malkolordo divar in gao to; ji hongudo cel in moy sifa, marka fe duregido ji fahex beposjui. Dwer, hu per da hay noro rinjon nor tokatul, sen bulbulapul ji burtyanpul. Ogarkalyen semeylu cel in alkoba ji xoratex kibiriti per panel; nini proceso sesu masele per kaydan; eskolnini xidu sesu katatul per dekora; ji dur kriban generasi, kwasi hay nilte cel na awidigi hin doyan visitayen or cel na xuli etesu harabu.
Sr. Enfild ji legayen sen in alo comen de ofdolo; mas denwatu hu ete ata cel comen de inididom, hinte lifti sesu andagumbo ji ixara.
“Kam yu le he banwatu xorjui den dwer?” te swal; ji denwatu hu tesu tonyen gibe sili jawabu. “To sen linkudo in misu siko,” te maxusgi, “ton daymo ajabu hikaye.”
“Kam sipul?” beloga Sr. Uterson, yon lil alocu fe voka, “ji dento le sen keto?”
Nun, to le sen hinpul,” Sr. Enfild ruloga: “Mi le nun ata cel ogar of ban loka fe fini de globa, fe daju satu tiga de syahe bardimosemli soba, ji misu dao leta pas bage de xaher feki hay fol mena nil okoible to minus lampu. Dolo ji dolo ji moy person somno—dolo ji dolo, moyoto lumindo kwas tas paradene xinentim ji moyoto denmo kal kom ibadadom—finki fe fini mi inidi den estatus fe siko feki ixu juiore ji juiore ji xoru na dayxiwon se na beoko polisiyen. Total samawatu, mi oko dua figura: un te, lil ixu hu da ordenukal anda cel dongu dur bon sampo, ji alote nini lao ible fe oco or des hu da pawbu denmo velosi kom te sen abil fol ixeli dolo. Nun, senyor, dua te kufimo naturali soho jijon in gono; ji denwatu daybur bage de xey ata; koski ixu trankwilo perpeda nini su jismu ji resta te ayayne per geo. To orecu kom nilto na ore, mas na oko to sen jahanomsim. To no sen denpul kom ixu; to sen denpul kom ban lanetudo Jaganata. Mi gibe xosu ha-lo, ji fe na dadal te, mi cudu gardan de hin senyor, ji ruporta te cel loka feki uje hay daydenpul grupo wey ayayne nini. Te sen perfetomo trankwilo ji nilmaner antiya, mas te pafi un okoya tas mi, daydenmo colo celki to cudu sweta ex mi kom pawbu. Personlari hu da preata sen nini su famil; ji jaxali, dotor, hu tas da te beirsal, gibe sesu precu. Nun, nini no sen daydenkwanti maxmo bur, maxmo fobido, fol ostomenxaryen; ji fe folo, yu ible ger jadin, ger hay fini tas to. Mas hay un jixipelne halu. Mi bekakupel unyum okocu fe hin senyor. Pia nini su famil ganjon hinpul, to sol sen naturali. Mas dotor su kaxa sen to hu da jijon misu jui. Te sen totalmo ordinari davadukanyen, fe nil espesyal laoje ji kolor, har bala Edinbruli aksento ji daju ganjonfil kom baopaype. Nun, senyor, te sen denpul kom restane imi; fe moy watu feki te oko misu poshuruyen, mi oko ki jabareosto bimarcu ji sefidecu kos xiwon fe na morgi te. Mi jixi ku keto sen in tesu siko, sama kom te jixi ku keto sen in misu to; ji fe morgi na sen nenible, imi fale kriban. Imi loga tas ixu ki imi povas ji xa fale daydenpul eskandal of hin okur celki nasacuburcu tesu name of un poscentro of London cel aloto. Eger te hare he ban doste or he ban reputasi, imi vada ki te ger sonxi oto. Ji total samawatu, durki imi amusa te yon imisu atexne lexi, imi jularestagi femixu of te maxim bon kom ible koski ete sen denmo yesen kom harpi. Mi nilwatu le oko dayra fe daydenmo nefrapul muka; ji hay manixu in midiya, har banpul syahe hahali trankwiloya—pia fobido, mi abil na oko dento—mas fe na ofporta masele, senyor, real kom Xatan. ‘Eger yu seleti na xuha kapital of hin xigo,’ te loga, ‘Mi sen naturalimo sahaykal. Moy senyor ger xiwon na bloki eskandal,’ te loga. ‘Am name yusu kima.’ Nun, imi supranicode te cel cen pawndu tas nini su famil; te ger mingu vole na juicu; mas hay banto wey moy imi hu da inxo malfale, ji fe fini te kapitulacis. Restane ergomon sen na cudu pesa; ji yu ger fikir ku te tonporta imi cel keloka minus loka har den dwer?—te excudu yawxe, inidi, ji fori ruata har des pawndu fe dahabu ji ceke fe Cuts por resta, cududo kom payaible tas portayen ji saynido yon name hu mi no abil na zekar, mas to sen un to of tyan de misu hikaye, mas to sen name, fe minimumya, daymo bon konedo ji pimpanmo printido. Kwanti sen sakate; mas sayni sen bon por max to kom dento sol eger to sen awtenti. Mi izin mi na juigi misu senyor ki total masele okocu xankalaye, ji ki ixu nilwatu, in real jiwa, anda cel in dwer de baxcengu dur satu care in soba ji exidi har alotesu ceke por kriban cen pawndu. Mas te sen relativomo trakwilo ji coxohahane. ‘Am trankwilogi sesu siko,’ te lo, ‘Mi xa resta ton yu funki banko buka ji seli mi xa pesagi ceke.’ Fe folo, moy imi xoridi, dotor, ji ninisu patre, ji imisu doste ji mi, ji pasa restane noce in misu kamer; ji jaxali din, denwatu hu imi le uje sobayam, tongo idi cel bako. Seli mi gibe ceke, ji loga ki mi hare moy seba na imanu ki to sen falsoxey. Sed total nilmaner. Ceke sen awtenti.”
“Tut-tut,” Sr. Uterson loga.
“Mi oko ki yu ganjon kom mi,” Sr. Enfild loga. “Si, to sen bur hikaye. Koski hin ixu sen denpul te hu nilte abil na gwanxi da, daymo lanetulaye ixu; ji person hu da eskri ceke sen sati benji de penliya, pia xohrapul, ji un te (hu da maxburgi to) of denete hu da fale dento hu ete namegi "bono to". Xantaje, mi jadin; xankakal ixu fe na azizu paya ban possofi of sesu juniya. Baytu fe Xantaje sen name hu mi gibe da tas dom har dwer, fe folo. Fe hataya ki hata dento, yu jixi, total no kufi xomin moyto,” te maxusgi, ji yon den lexi te sokutu cel in nururoya.
Of to te beruvoka Sr. Uterson fe na relativomo abruto swal: “Ji yu no jixi kama jaror de ceke ogar denloka?”
“Dayible loka, kam no?” ruloga Sr. Enfild. “Mas to okur, ki mi le xorjui tesu adresu; te ogar in ban gwancan or aloto.”
“Ji yu le nilwatu swal tem den—loka har dwer?” Sr. Uterson loga.
“No, senyor: Mi sen bejuinenfil,” jawabucu. “Mi daymo multi ganjoncu tem na swal swal; to godo filya estilo de Finili Hukimu. Yu idigi swal, ji to sen denpul kom na idigi petra. Yu sotikal sidi per kapi de liljabal; ji petra infraidi, fe na idigi alooto; ji jaxali ban neninteresne lamayen (finili te hu yu ger fikir tem da) bedarbe per kapi in sesu rukeli jarden ji famil musi na alogi sesu name. No senyor, mi fale tas mi regula: folki to max okocu Dolo Ajabu, mi min swal.”
“Daymo bon regula, sipul,” legayen loga.
“Mas seli mi nun le estudiloka,” Sr. Enfild duregi. “To eskaso kwasisen baytu. Hay nil alo dwer, ji nilte idi oro cel in or ex dento minus, fe un mara in daywatumon, senyor fe misu aventur. Hay tiga janela, hu da oko medan, per cengu un; nil infrali to; janela moywatu sen klosido mas oto sen sage. Ji maxpul hay dudantubo hu da umumi dududan; fe folo bante mimbay ogar denloka. Ji hata to no sen daydenmo yakin; koski kostruixey denkwanti intrepresyon wey medan, ki to sen katina na loga ku un to fini ji aloto xoru.”
Duayen ripul anda cel fronta dur bankwanti watu fe sotikalya; xafe to “Enfild,” Sr. Uterson loga, “den yusu regula sen bon to.”
“Si, mi fikir denpul,” Enfild ruloga.
“Mas fe hata fe moy dento,” legayen duregi, “hay un tema hu mi vole na swal tem da: mi vole na peti name de den ixu hu da peda per nini.”
“Nun,” Sr. Enfild loga, “Mi no oko ku to ger kosa ke problema. Te sen ixu har name Hayd.”
“Hm,” Sr. Uterson loga. “Te okocu kom kepul ixu?”
“Te no sen asanmo tosifuible. Hay ban mal to tem tesu okocu; ban nenbesukine to, ban totalmo nefralaye to. Mi le nilwatu oko ixu hu mi dayhinkwanti possuki, mas mi eskaso aham ku keseba. Te mimbay sen malformado banloka; to bala ganjongi banpul malforma tas ren, fe hataya, mi no le abil na especifigi tosu loka. Te okocu ultraordinari ixu, mas mi yakin no abil na namegi he ban normakal to. No, senyor; mi no sukses to; mi no abil na tosifu te. Ji to no sen kos wala fe memori; koski mi deklara ki mi abil na rioko te fe hin momento.”
Sr. Uterson ripul anda cel banloka sotikal ji mimbay bax wajen fe kolyo. “Yu sen yakin ki te le yongu yawxe?” te swal fe fini.
“Azizu senyor …” Enfild xoru, fe na sen surprisado.
“Si, mi jixi,” Uterson loga; “Mi jixi ki to mimbay kwasisen ajabu. Fe fato, eger mi no peti of you name de alo taraf, seba sen koski mi uje jixi to. Yu aham, Ricard, ki yusu hikaye le jijon. Eger yu le sen mal tem he ban tema, to ger sen maxmo bon, ki yu am sahigi to.”
“Mi fikir ki yusu musiya ger sen na jingo mi,” alote jawabu yon bankwanti poskwehoya. “Mas mi dupul sen regulafilmo preciso, kom yu namegi to. Yen hare yawxe; ji maxpul, te haji hare to. Mi oko te na yongu to fe sol jaleli sabedin.”
Sr. Uterson amiku exnafasu mas loga nil lexi; ji juni ixu jaxali duregi. “Prehay alo darsu na loga nilto,” te loga. “Mi bexyuci kos misu lungo xeto. Imi am sohovada na ripul tempala hinto nilwatu.”
“Yon misu total tutum,” legayen loga. “Mi gibe hanta tem dento, Ricard.”